YATHARTHTHAM

யதார்த்தம்

தமிழில் உள்ள நூல்களில் ஒரு காலத்தில் முக்கியத்துவம் வகித்தவை 'நீதி நூல்கள்'. 
உலகியல், வாழ்வியல், யதார்த்தங்கள், உண்மைகள், ஸைக்காலஜி என்னும் மனவியல், Behaviour Science, Reaction and Abreaction, பழக்க வழக்கங்கள், மரபியல், உவமையியல், தத்துவங்கள் போன்ற பல விஷயங்களை உள்ளடக்கிய நூல்கள் இருந்தன. 
குமரேச சதகம் போன்ற சதக நூல்கள், நீதிசாரம் போன்ற நூல்கள் அதிகமாகப் படிக்கப்பட்டன. 
இந்த Trend இன்று நேற்று ஏற்பட்டவை என்று சொல்லமுடியாது. 
புறநானூற்றிலேயே இந்த மாதிரியான கருத்துக்களையெல்லாம் காணலாம். 
மாதிரிக்கு ஒன்று.....

தெண்கடல் வளாகம் பொதுமையின்றி
வெண்குடை நிழற்றிய வொருமையோர்க்கும் 
நடுநாள் யாமத்தும் பகலும் துஞ்சான்
கடுமாப் பார்க்கும் கல்லா வொருவற்கும் 
உண்பது நாழி உடுப்பவை இரண்டே 
பிறவும் எல்லாம் ஓரொக்கும்மே

இது புறநானூற்றுப் பாடல்.
என்ன அர்த்தம்?

கடலே எல்லையாகக் கொண்டு நிலம் முழுவதையும் வேறு யாருடனும் 
பங்கிட்டுக்கொள்ளாமல் தாமே தமக்குரியதாக தம்முடைய வெண் கொற்றக் குடையின் கீழ் தம்முடைய ஏகபோக ஆட்சியில் ஆண்டிருப்பவரும் சரி; 
நடுச்சாமமோ நடுப்பகலோ என்று பாராது இரவும் பகலுமாக தூங்காமல் 
உணவுக்காக காடுகளில் இருக்கும் மிருகங்களைத் தேடி அவற்றை 
வேட்டையாடுவதையே முழுநேரத் தொழிலாகக் கொண்ட கல்வியில்லாத ஒருவருக்கும் சரி.......

உண்பது ஓர் ஆழாக்குப் படி உணவே
உடுப்பதுவும் அடிப்படையில் இரண்டே துணிகள்தாம்

இதைப் பாடியவர் ஈராயிரம் ஆண்டுகளுக்கும் முன்னால் வாழ்ந்தவர். 
பிற்காலப் புலவர் ஒருவர் பாடிய ஓர் உலகியல் யதார்த்தப் பாடலையும் 
பார்க்கலாம்.

அன்புடன்

ஜெயபாரதி

DHANA DHARMAM

தானமும் தர்மமும் 

அறஞ்செய விரும்பு

அன்பர்களே,

ஈகை நம் சமுதாயத்தில் எவ்வளவோ முக்கியத்துவம் வகித்தது.
ஆனால் பிற்காலத்தில் ஈகையை வெறுத்து, கொடை 
கொடுக்காமல் தப்பிக்க வழி தேடிய யாரோ புண்ணியவான் ஒருவர் பழமொழி ஒன்றை ஏற்படுத்திவிட்டார். 
'தனக்கு மிஞ்சிதான் தானமும் தருமமும்' என்பதே அது. இதைப் புத்திசாலித்தனமாகக் கையாண்டால் நல்லது. 
ஆனால் உண்மையிலேயே கஞ்சத் தனத்திற்குச் சப்பைக்கட்டு கட்டுவதற்கே இந்தப் பழமொழி தற்சமயம் நாட்டில் (மலேசியா) நம்மவர்களால் பயன்படுத்தப்படுகிறது.
நல்லவேலை ஔவையார் காது பட இந்த ஆள் இதைச் சொல்ல வில்லை. சொல்லியிருந்தால் ஏழேழு தலைமுறைக்கும் பாடியே சபித்துவிட்டிருப்பார். 

தன்னையும் மிஞ்சி தானமும் தர்மமும் செய்தவர்களின் 
பெயரும் புகழும்தான் இன்றளவும் வாழ்கின்றன.

பெண் ஒருத்தி தன்னையும் மிஞ்சி அளித்த நெல்லிக்கனி 
தானம்தான் உலகிற்கு கனகதாரா தோத்திரத்தை ஆதிசங்கரரின் 
வாயிலாக ஏற்படுத்தித் தந்தது.
தன் தலையையும் புலவருக்குக் கொடுத்த குமணனின் பெயர் நிலைத்து நிற்கிறது.

ஈரக்குணம் இல்லாதவர்கள் நம்முடைய நீதி சாஸ்திரங்களாலும் பெரும் புலவர்களலும் சபிக்கப்பட்டவர்கள்!

'ஈதல் இசைபட வாழ்தல் அதுவல்லது
ஊதிய மில்லை உயிர்க்கு'   (குறள்)

சமுதாயம் நோயுற்ற சமுதாயமாக விளங்கி விடக்கூடாது 
என்பதற்காகத்தான் முப்பத்திரண்டு வகை அறங்களை 
ஏற்படுத்தினார்கள். 
தர்மங்களைப் போற்றிப் பாதுகாப்பவள் அம்பிகை. 
அறம் வளர்த்த நாயகியாகவும் தர்ம சம்வர்த்தினியாகவும் 
அன்னபூரணியாகவும் அவளே விளங்குகின்றாள்? 
தர்மம் என்பது தெய்வீகத்தன்மை வாய்ந்தது. 
Caring Society என்பதைத் தமிழர்கள் மிகப் பழங்காலத்திலேயே தர்மங்களின் உதவியோடு நிறுவியிருக்கிறார்கள்.

சமுதாயத்தை ஆங்கில மரபில் இருவகையாகப் பிரித்துள்ளனர். 
‘Give Society, Take Society’ கொடுக்கும் சமுதாயம் எடுத்துக் கொள்ளும் சமுதாயம் என்பவையே அவை. 
கொடுக்கும் சமுதாயம் தியாக உணர்வு கொண்டது. 
எடுத்துக் கொள்ளும் சமுதாயத்தில் சுயநல உணர்வுதான் மேலோங்கி நிற்கும். 
கொடுக்கும் சமுதாயத்தின் தியாகத்தால் எடுத்துக் கொள்ளும் சமுதாயம் வாழ்ந்து, வளர்ந்து, வளமுடன் விளங்கும். 
இது மனித சமூகவியல் நியதி. 
கொடுக்கும் சமுதாயம் இல்லையெனில் மனிதர்கள் ஒருவரை ஒருவர் கொன்று கொள்வர். சமுதாயமும் முடிவில் அழிந்துவிடும்.

டார்வின் சித்தாந்தப்படி மிருக உணர்வு கொண்ட பலவான்களே எஞ்சுவர்.

தனக்கு மிஞ்சியே தானம் செய்யுமாறு எந்தச் சமயமும் 
போதிக்கவில்லை.

தன்னுடைய சம்பாத்தியம் எவ்வளவாக இருப்பினும் அதில் ஒரு குறிப்பிட்ட பகுதியை ஸக்காட் (zakat), ·பித்ரா Fitra என்ற பெயரில் கொடுக்குமாறு இஸ்லாம் கூறுகிறது. 
'டித்' (Tith) என்ற பெயரில் அதுபோன்ற தர்மத்தைக் கிருத்துவம் வலியுறுத்துகிறது. 
'தம்மதான' என்று அதையே பெளத்தமும் வற்புறுத்துகிறது. 
'ஸெடெக்கா' என்றொரு வகை தர்மத்தை யூதர்கள் செய்கிறார்கள். 
இவை அனைத்துமே வலியுறுத்தப்பட்ட தர்மங்கள்.

இந்து சமயம் மட்டும் விதிவிலக்கா என்ன?

தனக்கு மிஞ்சியதை மட்டுமே கொடுப்பது தானமோ, தர்மமோ அல்ல, அது எச்சில்பண்டம், பிச்சை. 
தனக்கு மிஞ்சியதை எப்படி நிர்ணயிப்பது? 
ஆசைக்கோர்; அளவில்லாமல் இருப்பவர்களுக்கு எதுதான் 
எப்போதுதான் மிஞ்சும்?

தானம் கொடுப்பவர்களின் மனப்பான்மை, சூழ்நிலை முதலியவற்றை அடிப்படையாக வைத்து தலைப்படுதானம், இடைப்படுதானம், கடைப்படுதானம் என்று தானத்தையே கூட வகைப்படுத்தியுள்ளார்கள். 
பெயருக்காகவோ, கைம்மாறு கருதியோ, ஏதாவது  காரணத்திற்காகவோ, வற்புறுத்தலுக்காகவோ, பயத்தாலோ கொடுக்கப் படும் தானத்தைக் கடைப்படுதானம் அல்லது அதமதானம் என்று கூறுவார்கள். 
வசூல் செய்து, கூட்டத்தைக் கூட்டி, யாராவது முன்னிலையில் ஏழைகளைக் கூப்பிட்டு அவர்களுடைய இல்லாமையையும் இயலாமையையும் பகிரங்கப்படுத்தி, அவர்களுடைய சுயமரியாதையைப் பற்றிக் கவலையே படாமல், சில சில்லறைப் பொருள்களைப் பொட்டணம் போட்டு ஓராண்டிற்கு ஒருமுறை மட்டும் கொடுத்துவிட்டு, 
அந்த நிகழ்ச்சிக்கு முன்னரும் பின்னரும் படத்துடன் பத்திரிக்கையில் செய்தி போட்டுச் செய்யும் தானம் எந்த வகை தானத்தைச் சேர்ந்து என்று நீங்களே முடிவு செய்து கொள்ளுங்கள்.


தானம் கொடுப்பதும் கூட தகுதி பார்த்து, அதற்கேற்பச் செய்ய வேண்டும் என்று அறநூல்கள் கூறும். 

இதைப்பற்றி புறநானூற்றில் ஒரு பாடல் இருக்கிறது. 

ஒரு கொடையாளி இரவலர்களின் தகுதியறிந்து கொடுக்காமல் சகட்டுமேனிக்குப் பரிசில்களைக் கொடுத்துக்கொண்டிருந்தான். 
இதைப் பார்த்த ஔவையார் அதை எடுத்துக் காட்டி 
ஒரு பாடலில் அந்த கொடையாளிக்கு உணர்த்தியிருக்கிறார். 

கொடுக்கவேண்டிய பரிசிலைத் தாமதப்படுத்தினான், ஒரு மன்னன். "போடா...***" என்று அந்தப் பரிசிலை வாங்காமலேயே ஔவையார் சென்றுவிட்டார். 

பிரியமாகவும் மரியாதையாகவும் கொடுத்த தினைமாவையும், நீலச்சிற்றாடையையும் அவர் மனமுவந்து ஏற்றுக்கொண்டார். 

யாருக்குக் கொடுக்கிறோம்; அவருக்கு எப்படி கொடுக்கவேண்டும்; எதைக் கொடுக்கவேண்டும்; எப்போது கொடுக்கவேண்டும் என்பதற்கெல்லாம் எழுதா முறைகள் வைத்திருந்தார்கள்.

'பாத்திரம் அறிந்து பிச்சையிடு' என்று பழமொழி இருக்கிறதல்லவா? இதையும்கூட தவறாகப் புரிந்து கொண்டிருக்கிறார்கள். 
நெளிந்த அலுமினியப் பாத்திரத்தில் பிச்சை வாங்கினால்  மிஞ்சியதைப் பழையதைப் பிச்சையாகப் போடலாம். தங்கப் 
பாத்திரத்தைக் கொண்டுவந்தால் பொன் நாணயங்களாகப்  போட வேண்டும் என்ற மாதிரியில் அவர்களாகவே நினைத்துக்
கொண்டிருக்கிறார்கள். 
பாத்திரம் என்பது தகுதி. எந்த மாதிரியான தானத்துக்குத் தகுதி படைத்தவர்? அவருடைய தேவை எப்படிப்பட்டது? இதெல்லாம் முக்கியமாகக் கருதப்படும்.
'பெரிய மனிதர்கள் நிதி திரட்டினால் நிறையக் கொடுக்கவேண்டும். எளியவர்கள் எவ்வளவு தகுந்த காரியத்திற்காகக் கேட்டாலும் பிச்சைக்காரத்தனமாகக் கொடுக்க வேண்டும்', என்ற ரீதியில் எத்தனையோ பேர்கள் நடந்துகொண்டுதானே இருக்கிறார்கள்.

நியாயமாகச் சம்பாதித்து, சிக்கனமாக இருந்து, சேமிப்புடன், திட்டமிட்டு, தகுதி பார்த்து, ஏதாவது தர்மமும் செய்யவேண்டும். அதாவது தர்மத்தையும் மாதாந்திர பட்ஜெட்டில் சேர்த்துக் கொள்ள வேண்டும் - என்பதனையே நீதி நூல்கள் வலியுறுத்துகின்றன.

இல்லற தர்மத்தைக் கூறும்போது சென்ற விருந்தினரை 
வழியனுப்பிவிட்டு வாசலிலிருந்தவாறே அப்போதே, வரும் விருந்தை 
எதிர்நோக்கும் மனப்பாங்கைப் பற்றிச் சொல்கிறார். யார்?
திருவள்ளுவர்தான் அப்படிச் சொன்னார்.

ஆகவே,

ஆற்றின் அளவறிந்து ஈக அதுபொருள்
போற்றி வழங்கு நெறி

இல்லையேல்,

உளவரை தூக்காத ஒப்புரவாண்மை
வளவரை வல்லைக் கெடும்

முடிவில்

அளவறிந்து வாழாதான் வாழ்க்கை உளபோல
இல்லாகித் தோன்றாக் கெடும்.

'லட்சுமியை வழிபட்டால் நிறையச் செல்வங்களைத் தருவாள். நாமே வைத்துக் கொண்டு நாம் மட்டுமே நன்றாக இருப்போம்', என்று பெரும்பாலும் எண்ணத் தோன்றும். 
'தர்மமும் தானமும் வேறொரு பிரிவைச் சேர்ந்தவை. வேறு ஏதோ தெய்வத்தின் கட்டுப்பாட்டில் உள்ளவை', என்றும் நினைக்கக்கூடும்.

அவ்வாறில்லை. லட்சுமியின் வழிபாட்டில் தர்மத்துக்கு முக்கியமான பங்குண்டு. அளவான தர்மத்தை வழங்கிக் கொண்டே இருப்பது லட்சுமிகரத்தின் இன்றியமையாததொரு அம்சமாகக் கருதப்படுகிறது.

தமிழர்களுக்கு உரிய சில சிறப்பியல்புகள் இருப்பதாகச்  சொல்வார்கள். 
இவை என்னென்ன என்று பார்க்கலாம். 
சில விஷயங்களைத் தமிழர்கள் உயிருக்கும் மேலாகக் கருதி யிருக்கின்றனர். 
வீரம், மானம், ஈகை, சொல்லுறுதி, கடமை.
இவற்றுடன் மொழி, இனமான உணர்வு என்பதையும் சேர்த்துக் கொள்ளவேண்டும். 
ஏனெனில் இவற்றையும் உயிரினும் மேலாகக் கருதுபவர்கள்  
இருக்கிறார்கள். 
1965-ஆம் ஆண்டு ஜனவரி 26-ஐ நினைவில் கொள்ளவேண்டும். 
ஈழ விடுதலைப் போராட்டத்தை மனதில் கொள்ளவேண்டும்.
இப்படி எழுதியதற்கும் ஏதாவது மறுப்பு எழப்பக்கூடும்.
வேண்டாம். 
இவற்றிற்காக உயிரைக் கொடுத்தவர்கள் இருக்கிறார்கள். 
அவர்களின் ஆத்மாவைக் காயப்படுத்தவேண்டாம்.

இவற்றில் ஈகை, அறம், கொடை முக்கிய இடத்தைப் பிடிக்கிறது.
பொருள் தேடி வந்தவர்களுக்கு இல்லையெனாமல் கொடுப்பது 
ஒரு பெரிய விஷயமாக இருந்தது. 
கொடுக்க முடியாத சூழ்நிலையிலிருந்தால் அதை நினைத்து 
வேதனைப் பட்டவர்கள் இருந்தனர். 
பஞ்ச காலத்தில் விதைத்த நெல்லை, அடியார்கள் உணவு கேட்டு வந்துவிட்டார்களே என்று பதைபதைத்து, மண்ணிலிருந்து கிளறி எடுத்து, குற்றி, புடைத்து, அரிசியாக்கி, சோறாக்கி அன்னம் படைத்த கதை ஒன்று இருக்கிறது. 
யாராவது நாயனார்தானே இந்த மாதிரி வேலையையெல்லாம் 
செய்வார்?
இல்லையென்றால் சங்க காலத்து வள்ளல். 
வள்ளல் தன்மை இருந்ததால்தான் கம்ப ராமாயணம் போன்ற சிருஷ்டிகள் தோன்றின.

ஆனால் பிற்காலத்தில் ஈகையை வெறுத்துக் கொடை கொடுக்காமல் தப்பிக்க வழி தேடிய யாரோ புண்ணியவான் ஒருவர் பழமொழி ஒன்றை ஏற்படுத்திவிட்டார். 'தனக்கு மிஞ்சிதான் தானமும் தருமமும்' என்பதே அது. இதைப் புத்திசாலித்தனமாகக் கையாண்டால் நல்லது. ஆனால் உண்மையிலேயே கஞ்சத் தனத்திற்குச் சப்பைக்கட்டு கட்டுவதற்கே இந்தப் பழமொழி தற்சமயம் நம் மலேசிய நாட்டில் நம்மவர்களால் பயன்படுத்தப்படுகிறது.

$$$$$$$$$$$$$$$$$$$$$$$$$$$$$$$$$$$$$$$

BOOKS ON POSITIVISM

பாஸிட்டிவ் நூல்கள்

கிட்டத்தட்ட முப்பதாண்டுகளாக நான் அடிக்கடி நெப்போலியன் ஹில்லின் Think And Grow Rich என்னும் புத்தகத்தைப் பற்றிச் சொல்லி வந்திருக்கிறேன். 
சில ஆண்டுகளுக்கு முன்னர் Rich Dad Poor Dad என்னும் புத்தகம் வந்தது. ராபர்ட் கீயோஸாக்கி என்பவர் எழுதியது. 
இந்த நூலை ஒரு Ground Breaker என்று சொன்னார்கள். 
Think And Grow Rich என்னும் நூல் இருபதாம் நூற்றாண்டில் வெளியாகிய நூல்களில் அதிகத் தாக்கத்தை ஏற்படுத்திய நூல்களில் ஒன்று. சிலருடைய கருத்துப்படி அதுதான் மிக அதிகத் தாக்கத்தை ஏற்படுத்தியது. அதற்கும் மூல நூல் ஒன்று உண்டு - Law Of Success. நல்ல தடிமனான புத்தகம். இது மூல நூல் என்றால், Think And Grow Rich-சுக்கு வழி நூல்கள் பல இருக்கின்றன. 
Rich Dad Poor Dad நூல் வந்த சில ஆண்டுகளிலேயே அது MultiMillion Best Seller நிலையை அடைந்தது.
அதைத் தொடர்ந்து இன்னும் சில நூல்களை கீயோஸாக்கி எழுதினார். 

ஒரு நூல் விமரிசகர் இருபதாம் நூற்றாண்டின் ஈடு இணையற்ற புத்தகமாக எப்படி Think And Grow Rich விளங்கியதோ, அது போலவே இருபத்தோராம் நூற்றாண்டுக்கு Rich Dad Poor Dad நூல்", என்று எழுதியிருந்தார். 
இது ஓர் அருமையான Catch Phrase-ஆக விளங்கியது. இந்த வரியை 
எங்கும் பார்க்கலாம். அப்படிப்பட்ட விளம்பரம். 
1997-ஆம் ஆண்டு வெளியாகியது அந்நூல். 
இப்போது சில ஆண்டுகள்தாம் ஆகியிருக்கின்றன. இருபத்தோராம் 
நூற்றாண்டில் சில ஆண்டுகளே பூர்த்தியாகியிருக்கின்றன. 
ஆனால் அந்த நூல் Rich Dad Poor Dad இப்போதெல்லாம் அதிகமாகப் 
பேசப்படுவதில்லை. 

Think And Grow Rich இப்போது புதிய உருவில் வந்துவிட்டது. 

என்னிடம் கிட்டத்தட்ட ஐந்நூறு PMA - Positive Mental Attitude சம்பந்தப்பட்ட புத்தகங்கள் இருக்கின்றன. 

Og Mandino, Zig Ziglar, Maxwell Maltz, Wayne Dyer, Tom Peters, Steven Covey, Anthony Robbins, Denis Waitley, Norman Vincent Peale, Drs. Shuller, Canfield And Hansen, Clement Stone, Lawrence Peter, Michael Korda, Edward Bono, என்று நூலாசிரியர் பட்டியல் நீண்டுகொண்டே போகும். 

இவர்கள் எழுதியவற்றில் மிகச் சிறந்த நூல்களாகப் பார்த்து வாங்கி 
சேர்த்திருக்கிறேன்.

As A Man Thinketh நூல்கூட இருக்கிறது. 1902-ஆம் ஆண்டில் வெளிவந்த நூல். சிறிய நூல். James Allen என்பவர் எழுதியது. பைபிலில் உள்ள 
ஒரு வாசகத்தையே - For as he thinketh in his heart, so is he: - தலைப்பாகவும் 
சித்தாந்தமாகவும் கொண்டுள்ள நூல். PMA நூல்களில் முதல் வரிசையில் வைத்தும்  
காலத்தால் முற்பட்ட நூலாகவும் கருதப்படுவது இந்நூல். நூற்றைம்பது ஆண்டுகளுக்கு முன்னர் எழுதப்பட்ட Samuel Smiles-ஸின் நான்கு 
நூல்களும்கூட என்னிடம் இருக்கின்றன. 

இப்போது வந்துள்ள புத்தகங்களில் சில......
The Monk Who Sold Hi Ferrari, Maxwell Maltz-ஸின் Psycho-Cybernetics - 
நான்கு பகுதிகள், David Posen-னின் Always Change A Losing Game, Steve Chandler-இன் 100 Ways to Motivate Yourself: Change Your Life Forever. 
Its Always Too Soon To Quit, Dare To Fail என்னும் புத்தகங்கள் கொஞ்சம் 
வித்தியாசமானவை. இவற்றில் அடிக்கோடு - Bottom Line என்பதைத்தான் 
அப்படிச் சொல்லியிருக்கிறேன் - தோல்வியைக் கண்டு அஞ்சாமல், கஷ்டத்தைக் கண்டு சலிக்காமல் விடாமுயற்சியோடு மன உறுதியோடு சவால்களை எதிர்நோக்கி வெற்றி பெறமுயல்வது. இதில் குறிப்பிடத் தக்க நூல், Dr.Schuller-ரின் Tough Times Dont Last, Tough People Do. When The Going Gets Tough, The Tough Get Going என்பதே இதன் சித்தாந்தம்.
இவையெல்லாமே மிகவும் பயனுள்ள புத்தகங்கள்தாம். பலருக்கு 
உதவியிருக்கின்றன.
பயத்தைப் போக்குவதற்கு, டிப்ரெஷனைப் போக்குவதற்கு, தாழ்வு 
மனப்பான்மையைப் போக்குவதற்கு, ஸ்ட்ரெஸ்ஸைப் போக்குவது...... இப்படி ஏராளமான Genres. How To...... வரிசையில் எண்ணிகை அற்ற புத்தகங்கள். 
'........ For Idiots' என்ற வரிசையில் பல புத்தகங்களை வெளியிட்டிருக்கிறார்கள்.
ஆனால் மலேசியாவில் உள்ள தமிழ் புத்தகக் கடையில் தமிழர்கள் 
என்ன மாதிரியான புத்தகங்கள் வாங்குகிறார்கள், தெரியுமா?

அன்புடன்

ஜெயபாரதி

YAVANA MADHU

யவனர் தந்த மது-#1

தமிழர்களிடம் பலமாதிரியான மதுவகைகள் இருந்திருக்கின்றன. சங்க இலக்கியத்தில் அரியல், அரி, நறா, நறவு, கள், மது, பிழி என்று விதம் விதமாக இருந்தன. பழம், அரிசி, கேழ்வரகு, தேன், முதலிவற்றிலிருந்து தயாரிக்கப்பட்டவை தவிர, தென்னங் கள், பனங் கள், ஈச்சங் கள்,  மாதுளம் கள் என்று பல வகை.
இருப்பினும் ஏன் யவனத்திலிருந்து மதுவை ஏராளமாக இறக்குமதி 
செய்தார்கள் என்பது குறித்து ரொம்ப நாட்களாக எனக்கு அதிசயமும் ஐயப்பாடும் இருந்துவந்தது. 
இது குறித்து இணைய கிரேக்கர்கள் சிலரிடம் கேட்டேன். 
அவர்களிடம் இருந்த சிறந்த பழங்கால மதுவகைகளைப் பற்றி விசாரித்தேன்.
குறிப்பாக தேன், திராட்சை ஆகியவற்றைப் பற்றி விசாரித்தேன். 
அவர்கள் கொடுத்த தகவல்களைத் திரட்டி, தொகுத்து இணைத்துத் 
தந்திருக்கிறேன். 

கிரேக்கத்தில் ஒரு குறிப்பிட்ட இடத்தில் விசேஷமான மண்வளம் உண்டு. அது ஒரு தீவு. லெஸ்போஸ் என்னும் பெயர். 

லெஸ்போஸில் ஒரு மிகச் சிறப்பான திராட்சை இருக்கிறது. 
விசேஷமான மணமும் ருசியும் மிகுந்தது. 
திராட்சை மது செய்யும் இடங்களில் இரண்டு ஆள் உயரமுள்ள குதிர்கள் வைத்திருக்கின்றனராம்.
அவற்றின் அடிப்பாகத்தில் மூடவும் திறக்கவும் முடியக்கூடிய துவாரங்கள் உண்டு. 
  லெஸ்போஸ் திராட்சை நன்றாகக் கனிந்ததும் அவற்றை அந்தக் குதிருக்குள் கொட்டுவார்களாம். மேலும் மேலும் கொட்டிக்கொண்டே இருப்பார்கள். 
மேலேயுள்ள திராட்சைகளின் கனத்தால் கீழேயுள்ள கனிந்த திராட்சைகளில் கசிவு ஏற்படும். அந்தக் கசிவு சாறு குதிருக்கு அடியில் இறங்கி துவாரங்களின் வழியாக வெளியில் வரும். 
மேலேயுள்ள பழங்களிலும் சாறு கசிந்து பல்லாயிரக்கணக்கான 
திராட்சைகளின் கசிவு சாற்றோடு சேர்ந்து இறங்கி வரும். 
மற்ற இடங்களில் மாதிரி திராட்சைப் பழங்ளைப் பெரிய தொட்டிகளில் கொட்டிவைத்து, தொட்டிகளுக்குள் ஆட்கள் வெறும் காலோடு குதித்து, தறுக் புறுக் என்று மிதித்து துவம்சம் செய்து சாற்றைப் பிழிவதில்லை. 
லெஸ்போஸ் சாறு, கனிந்த பழங்களிலிருந்து தானாக ஊறிய கசிவு. 
இந்தக் கசிவு சாற்றைக் கை படாமல் எடுத்து அம்·போரே எனப்படும் 
ஜாடிகளில் மூடிவைத்து நொதிக்க விடுவார்களாம். நொத்தித்து வரும் மது கெடாமல் இருப்பதற்கு ஏதோ சேர்ப்பார்களாம்.
இந்த மது ஜாடிகளைக் கப்பல்களின் அடியில் உள்ள Hold-களில் வைத்துப் பங்கடவாகப் பதவிசாகத் தமிழ் நாட்டுக்குக் கொண்டுவந்து, "யவனர் தந்த வினைமான் நன்கலங்களில் ஊற்றி ஊற்றி யவனப் பெண்கள் ஏந்தி ஏந்தி கொடுக்க கொடுக்க மாந்தி மாந்தி மகிழ்வோம் நாமே" என்று நம்ம ஆட்கள் திளைத்திருக்கின்றனர். 

இன்னொரு மதுவும் பேர்போன மது.........

               $$$$$$$$$$$$$$$$$$$$$$$$$$$$$$$$$$$$$$$$$

ONJIMORE!!!

திருப்புகழ் வள்ளிமலை சுவாமிகள்

ஒஞ்சிமோர்

இப்போது இருக்கும் சிறந்த நுணுக்கங்களைக் கொண்டு புராணங்கள், 
இதிகாசங்கள், Folk Tales எனப்படும் கர்ண்பரம்பரைக் கதைகள் முதலியவற்றைச் சினிமாப் படங்களாக எடுக்கலாம். மகாபாரதம், ராமாயணம் போன்றவற்றை எடுக்கிறார்கள். ஆனால் அவை வடநாட்டுப் படங்கள். அவையும் அவற்றின் வசனங்களும்..... 
தமிழிலேயே அவற்றை எடுக்கவேண்டும். 
ஒரு காலத்தில் கதைகள் சொல்வோர் இருந்தனர். கதாகாலட்சேபமும் இருந்தது. கோயில்களில் புராணம் படித்தலும் புராண அரங்கேற்றமும் இருந்தது.
இப்போதுள்ள பரபரப்பு நிலையில் யாரும் எங்கும் அமைதியாக மெனக்கேட்டு உட்கார்ந்து கதை கேட்கப்போவதில்லை. 
ஆகவே கதை சொல்வதைப் படமாக்கினால்.....? அல்லது ஸீடீயாகப் பதிவு செய்தால்...? 
அவரவர் இஷ்டத்துக்கும் வசதிக்கும் ஏற்ப கதைகளைக் கேட்கமுடியும். 
ஒரு காலத்தில் தெருக்கூத்து நடக்கும்போது நடிகர் யாராவது சிறப்பாக ஒரு காட்சியில் நடித்துவிட்டாலோ, பார்வையாளர்கள், 'ஒஞ்சிமோர்' கேட்பார்கள். 
இஞ்சியையும் சீரகத்தையும் உப்பையும் போட்டு நீர்மோர் தயாரிப்பார்கள். 
இதை 'இஞ்சிமோர்' என்று சில சமயங்களில் சொல்வார்கள்.
அந்த இஞ்சிமோருக்கும் இந்த ஒஞ்சிமோருக்கும் சம்பந்தமில்லை.
'Once More" என்பதே ஒஞ்சிமோராக ஆகிவிட்டிருக்கிறது.
மேலைநாட்டு மரபில் Encore என்ற மரபு இருக்கிறது.
பாடிய பாட்டை மீண்டும் பாடுவது; அல்லது ஷோவின் முடிவில் அவர்களுடைய பேர் போட்ட பாட்டைப் பாடுவது அல்லது காட்சியை நடிப்பது. மோனோ ஆக்ட் என்பது அடிக்கடி என்கோருக்கு ஆளாவது உண்டு. 
திருப்புகழை உலகறியச்செய்த சித்தர் வள்ளிமலை சுவாமிகள். 
அவர் ஒருமுறை ஒரு கூட்டத்தில் திருப்புகழைப் பாடிக் கொண்டிருந்தார். அவர் சுருதிக்காகவும் தாளத்துக்காகவும் 'ஏகதாரை' என்னும் இசைக்கருவியைப் பக்கவாத்தியமாக வைத்துப் பாடுவார்.
பாடி முடித்ததும், கூட்டத்தில் இருந்த ஒருவன் "ஒன்ஸ்மோர்" என்று 
கத்தினான். 
ஆனால் சுவாமிகளோ, "நோமோர்" என்று சொல்லியவாறு ஏகதாரையை வைத்துவிட்டு எழுந்தார்.
ஒன்ஸ்மோர் கேட்டவன் ஒரு மாந்திரீகன். அவன் ஏதோ சூன்யத்தைப் 
பிரயோகித்துவிட்டான். 
சுவாமிகளிக் கை வீங்கிவிட்டது. ஏகதாரையைத் தூக்கவும் முடியவில்லை.
இதைத் தம்முடைய ஞானதிருஷ்டியால் அறிந்த சுவாமிகள் தம்முடைய தவ வலிமையால் சூனியத்தைத் திருப்பிவிட்டார்.
விரைவில் அந்த மாந்திரீகன் கதறிக்கொண்டு சுவாமிகளிடம் வந்தான். 
அவனுடைய கைகள் வீங்கியிருந்தன. மிகவும் வலியால் கஷ்டப்பட்டுக்கொண்டிருந்தான்.
"ஐயா, உங்களுடைய மகிமை தெரியாமல் செய்துவிட்டேன். மன்னித்து சௌகரியப்படுத்துங்கள்", என்று கெஞ்சினான்.
சுவாமிகள் கொஞ்சம் விபூதியை எடுத்தார். 
"நீ வைத்திருக்கும் அந்த மூணு சுழி மந்திரத்தை இனிமேல் யார்மேலும் பிரயோகிப்பதில்லை என்று சத்தியம் செய்", என்றார்.
அவனும் சத்தியம் செய்தான்.
அத்துடன் சுவாமிகள் திருநீற்றை அவன் கைகளில் போடவும் வீக்கம் மறைந்தது. வலியும் மறைந்தது.
பாருங்கள்... எங்கயோ ஆரம்பித்து எங்கயோ வந்தாச்சு.... இப்படி 
அடிக்கடி காஞ்சி பரமாச்சார்ய சுவாமிகள், தாம் உபன்யாசம் செய்யும்போது சொல்வதுண்டு.

$$$$$$$$$$$$$$$$$$$$$$$$$$$$$$

FROM AGATHIYAR-06082013

மூளைப் புகைச்சல்

அன்பர்களே,

Brain Fog என்றொரு நிலை உண்டு. 
மறதியிலேயே பலவகை உண்டு. 
"என்னாச்சூஊஊஊ...... விழுந்துட்டனா...... பின்மண்டயில அடிபட்டுச்சா..... அங்கதான மெடல்லா ஆப்லங்காட்டா இருக்கு..... டெம்பரரி மெமரி லாஸ் 
ஏற்படும்...... ரெண்டு நாளைல மாறிரும்....." என்பதுகூட ஒருவகைதான்.
பதினைந்து நிமிடத்துக்குமே எதுவும் நினைவில் இல்லாமல் போவதையும், அதற்காக உடல் முழுவதும் லிஸ்ட் போட்டுக்கொள்வதையும் Gajini Syndrome 
என்று பெயர் வைத்து, அதைப்பற்றி ஆராய்ச்சிப் பேப்பர்கூட படிக்கலாம்.
Short Term Memory Loss என்பது ஒருவகை.
Senile Dementia என்பதிலும் மறதி ஏற்படும்.
Brain Fog என்பதும்கூட ஒருவகை மறதிதான். இது ஒரு மாதிரியான 
குழப்பநிலை. 
"கதவைப் பூட்டினோமா இல்லையா?", என்று கோலாலும்ப்பூரிலிருந்து புறப்பட்டு, திருச்சியை நெருங்கும்போது திகில் வருவது; குற்றாலம் 
நீர்வீழ்ச்சியைப் பார்க்கும்போது, "குழாயை அடைத்தோமா இல்லையா?" என்ற சந்தேகம் வருவது..... இதுமட்டுமல்ல.
டிரவுசர் போட்டு ஸிப்பை இழுத்துவிடாமல் ஸெமினாரில் பேப்பர் வாசிப்பது போன்றவையெல்லாம் ப்ரேய்ன் ·பாக்தான். 
உண்மைக்கும் கனவுக்கும் வித்தியாசம் தெரியாத ஒரு வினோத நிலை இருக்கிறது. அதுவுமே அப்படித்தான்.
அன்றாடம் புழங்கும் சாதாரண பொருள்களின் பெயர்கூட நினைவுக்கு 
வராதது.... அடுத்த வீட்டுக்காரியின் பெயர் சட்டென்று வராமல், "அடி இவளே....." என்று அழைப்பது, இடத்தை நெருங்கும்போது வீட்டு அட்ரெஸ் மறப்பது, 
பார்த்த முகம்போல தோன்றி...."அவனா இவென்....?" என்று மனதுக்குள் 
கேட்டுக்கொள்வது.... நிலைமை மீறியபின்னரே "வந்துட்டாண்டா வந்துட்டான்", 
என்பது எல்லாம் Brain Fog தான்.

அன்புடன்

ஜெயபாரதி

MALAYSIAN MAGIC BOOK-#1

ABOUT THE BOOK -
MALAYSIAN MAGIC

There is a book called Malaysian Magic
The Book is a collection of several research papers.
They came out in certain journals on various occassions.
In 1986 or 1987, there was a course and work-shop for Hospital Managers and their managerial staff. This was held in a place called Taiping.
I was the Medical Superintendant of Kangar General Hospital in Perlis State.
I took my middle-management staff along.

There was a museum in Taiping.
I saw a fantastic collection of journals containing hundreds of research papers.
I collected a few and asked permission from the Museum curator to photocopy them.
Since I had helped him with some valuable information about some exhibits in the Museum, he lent me the journals.
I photocopied them and brought them to Kangar where I had them bound.
You know, in those days - before 1988, photocopy was an expensive affair.
I page cost 20 cents at that time.

The bound book contains the following important topics among several others.
This is a very useful and highly informative book.
Interesting to know.
Just go through the list of contents.

1.The Evil Eye
2.To Catch A Thief
3. Spirit Exorcism
4. Miscellaneous Malay Charms
5. Hate Magic
6. Love Magic
7. Sex Magic
8. Protective Magic
9. Business Magic
10. Legal Magic
11. Wealth Magic
12. Caballistic Alphabet
13. Magic Squares
14. Notes On Invulnerability and War Magic
15. Silat Gayong
16. Ilmu Ghaib (Invulnerability)
17. Criminal Magic
18. Buduh
19. Malay Magic Compass
20. Keramat

99 Glorious Attributes Of God

Aspects of Spirit - Mediumship, Trance, and Ecstacy in Peninsular Malaysia
1. Kuda Dancers
2. Taboo Language
3. The Seance
4. Fire-Walking

Black Magic
1. The Wax Doll
2. The Double Wax Doll

Measures To Counteract Santau
1. The Flying Egg
2. Invulnerability
3. Kebal Minyak
4. Kebal Pukau
5. Kebal Kulit Nangka
6. Kebal Daging
7. Kebal Penimbul
8. Kebal Sampul

When I can, I will write about some of the items.
I have already explained about Kebal Pukau and the Malay Sthambhana Vidhya.

                     $$$$$$$$$$$$$$$$$$$$$$$$$$$$$$$

NAAN- #1

நான் - #1

        காஞ்சியில் எங்களாழ்வான் என்றொரு வைணவப்பேரறிஞர் இருந்தார். 
வரதகுரு என்பவர் காஞ்சியில் இருந்த இளைஞர். அவருடைய தந்தை 
அவரை எங்களாழ்வானிடம் ஸ்ரீபாஷ்யம் என்னும் வைஷ்ண நூலின் விரிவுரையைப் பாடம் கேட்டு கற்றறிவதற்காக அனுப்பினார். 
எங்களாழ்வான் வீட்டு வாசல் கதவை வரதகுரு திறந்திருக்கிறார். அரவம் கேட்டு எங்களாழ்வான் "யார்ராது?" என்று கேட்டிருக்கிறார். 
ஏற்கனவே நன்கு பரிச்சயமான ஆளல்லவா. ஆகவே "நான் தான் 
வந்திருக்கிறேன்" என்றார். குரலை அடையாளம் கண்டுபிடித்துவிடுவார் என்ற எண்ணம். 
"ஓஹோ. அப்படியா? நான் செத்தபிறகு வந்துபார்", என்று சொல்லிவிட்டார். 
அதிர்ச்சியுடன் வீடு திரும்பிய வரதகுரு தம் தந்தையாரிடம் விஷயத்தைச் சொன்னார்.
அவர் சிரித்துக்கொண்டே, "நான் என்னும் தன்மையில்லாமல் வந்து 
பார்க்கச்சொல்கிறார். அது உண்மையிலேயே குருவிடம் ஸ்ரீபாஷ்யம் போன்ற ஒன்றைக் கேட்டுப் புரிந்து உணர்வதற்குத் தடையாக இருக்கும்"., என்றார்.
வரதர் மீண்டும் சென்றார்.
ஆழ்வான் மீண்டும் "யார்ராவன்?"
இம்முறை வரதர் மிகவும் பவ்வியமாக, "அடியேன் தாஸானுதாஸன் 
ஸ்ரீமத் ராமானுஜதாஸன்", என்று சொல்லி நெடுஞ்சாண்கிடையாக விழுந்து வணங்கினார்.
அதன்பின்......

பாடம் ஒழுங்காக நடந்தது. வரதகுரு தெளிவாகக் கற்றுக்கொண்டார். 

$$$$$$$$$$$$$$$$$$$$$$$$$$$$$$$$$$$$

HERO OR VILLAIN-#1

 ஹீரோவா, வில்லனா? -#1

இது உண்மையான ஆராய்ச்சிகளின் அடிப்படையில் தொகுத்து எழுதப் பட்டது. 
எழுதி ஏழாண்டுகள் ஆகின்றன. 
இன்னும் கொஞ்சம் விபரங்களைச் சேர்த்து பிழைகளை நீக்கி, செப்பம் செய்து எழுதியிருக்கிறேன்.

ஊமையனின் அண்ணன் வீரபாண்டிய கட்டபொம்மு பாஞ்சாலங் குரிச்சி அதிபராக இருந்தவர். ரொம்பவும் Controversial-ஆன ஆசாமி. 
அவருக்கு ஒரு மந்திரி இருந்தார். அந்தக் காலத்தில் மந்திரி, நிதிஅமைச்சர், படைத்தலைவர் போன்ற பல துறைகளில் இதில் கொஞ்சம் அதில் கொஞ்சமாக கொசிறு, துக்கடா சேர்ந்து ஆன கூட்டுக்கறிப் பதவிகள் இருந்தன. தளவாய், தானாபதி, பேஷ்வா போன்றவை. 
கட்டபொம்முவுக்கு சுப்பிரமணிய பிள்ளை என்பவர் தானாபதியாக 
இருந்தார். அவரை தானாபதியா பிள்ளை என்றே அழைத்தார்கள்.
கட்டபொம்மு நல்லவரா கெட்டவரா என்ற விவாதமெல்லாம் ரொம்ப 
விவகாரமான விஷயங்கள். 
அது போலவேதான் தானாபதியா பிள்ளையும்.
வீரபாண்டிய கட்டபொம்மு சினிமாப் படத்தில் இந்தப் பாத்திரத்தை உத்தமர்களில் உத்தமராகச் சித்தரித்திருப்பார்கள்.
ஆனால் இவர்தான் ரொம்பவும் Controversial-ஆன ஆசாமி. 

உண்மையிலேயே வெள்ளைக்காரர்களுக்கு விரோதி என்றால் இந்த 
ஆசாமிதான். 
கட்டபொம்மு தாம் ஆட்சியிலிருந்த ஒன்பது ஆண்டுகளில் பெரும்பகுதி வெள்ளைக்காரர்களுடன் நேசமாக இருந்த ஆள். 
ஒழுங்காக வரிகளைக் கட்டிக்கொண்டு ஆரம்பத்தில் இருந்தார்.
தானாபதியா பிள்ளை பாஞ்சாலங்குரிச்சியில் ஒரு சர்வாதிகாரியாக 
விளங்கியவர்.
இவர் தமிழகமெங்கும், அதற்கு அப்பால் மைசூர், கேரளா ஆகிய இடங்களிலும் விளங்கிய ஒரு மாபெரும் ரகசிய உளவாளி நெட்வர்க், 
திட்டமிடல் போன்ற விஷயங்களில் முக்கிய பங்கு வகித்தவர். 
இந்த நெட்வர்க் பிரிட்டிஷ் ஈஸ்ட் இண்டியாக் கம்ப்பெனிக்கு 
எதிரானது. கும்பினி என்றும் கும்பினியார் என்றும் அக்காலத் தமிழர்கள் 
இந்தக் கம்பெனியைக் குறிப்பிட்டனர்.
வரி வசூல், வர்த்தகம் போன்றவை தவிர படைபலத்தாலும் ஆயுத 
பலத்தாலும் சூழ்ச்சியாலும் நாட்டைப் பிடித்துக்கொள்ளும் எண்ணமும் 
கும்பினிக்கு இருந்தது என்பதை அந்தக் காலத்தில் இந்த புரட்சி 
நெட்வர்க்கினர் அறிந்திருந்தனர். பல பாளையங்கள், மைசூர், கேரளா 
முதலிய இடங்களில் நெட்வர்க் இருந்தது.
கட்டபொம்முவுக்கு ஆலோசனைகள் சொல்வதுடன் தம் வாக்கு 
சாதுர்யத்தால் மற்ற பாளையக்காரர்களையும் கலகம் செய்யத் தூண்டி
விட்டுக்கொண்டேயிருந்தார்.
கட்டபொம்முவுக்கு வெள்ளைக்காரர்களுடன் ஏற்பட்ட அத்தனை 
பிணக்குகளுக்கும் தானாபதியா பிள்ளைதான் காரணர்.
கட்டபொம்முவை விசாரிக்க அழைத்த ஜேக்ஸன் துரையின் 
அதிகாரத்தை ஒழித்தவர் தானாபதியா பிள்ளை. 
ஆனானப்பட்ட ஜேக்ஸனையே ஒடுக்கியவர் என்ற மமதையும் அவருக்கு இருந்தது. 
அவர் செய்து வந்த இடக்கான காரியங்களையெல்லாம் அப்போது 
தென்மாவட்டக் கலெக்டராக இருந்த லூஷிங்க்டன் சென்னைக்கு அறிவித்துக் கொண்டேயிருந்தார். 
வெள்ளைக்காரர்களின் முக்கிய முதல் எதிரியாகத் தானாபதியா 
பிள்ளையை அவர்கள் கருதினார்கள்.
நிலவரங்களைக் கண்டித்தும் காரணம் கேட்டும் லூஷிங்க்டன் 
கட்டபொம்முவுக்குக் கடிதங்கள் அனுப்பியிருந்தார். 
அந்தக் கடிதங்களையெல்லாம் தானாபதியா பிள்ளை படித்துவிட்டுக் 
கிழித்துவிடுவார். 
கட்டபொம்முவிடம் சொல்வதுமில்லை. 

அப்படியிருக்கும்போது தானாபதியா பிள்ளையின் மகனுக்குத் திருமணம் நிச்சயிக்கப்பட்டது. 
கட்டபொம்முவைவிட அந்த வட்டாரத்தில் தானாபதியா பிள்ளைக்கே 
செல்வாக்கு அதிகம். 
ஆகவே பெருங்கூட்டம் வருமென்று எதிர்பார்க்கப்பட்டது. 
திருமணத்துக்குக் கட்டபொம்மு நெல்லும் வெள்ளி ரூபாய்களும் 
கொடுத்தார். பணம் போதுமானதாக இருந்தது. 
ஆனால் நெல் போதவில்லை.
அந்தக் காலகட்டத்தில் பாளையங்களிலிருந்தும் மக்களிடமிருந்தும் பணமாக வரி வசூலித்ததுபோக நெல்லாகவும் வசூலித்தார்கள்.
இதையே பிரிட்டிஷ் கிழக்கிந்தியக் கம்பெனியாகிய கும்பினியும் செய்தது.
திருநெல்வேலி மாவட்டத்தில் நான்கு இடங்களில் பிரம்மாண்டமான 
நெற்களஞ்சியங்களைக் கும்பினி வைத்திருந்தது. 
அதைத் தானாபதியா பிள்ளை கொள்ளையடிக்கத் திட்டமிட்டார். 
ஐம்பது பேர் கொண்ட அதிரடித் தாக்குதல் வீரர்களைப் பொறுக்கி எடுத்துக் கொண்டார். 
அந்தக் காலத்தில் நம்ம ஆட்களும் Special Forces, Commando போன்ற விசேஷப் பிரிவுகளை வைத்திருந்தார்கள்.
வீட்டுக்கு ஒரு ஆள் என்ற வகையில் ஈட்டியையும் அகப்பட்ட கத்தி, 
கம்பு, கபடாக்களைத் தூக்கிக்கொண்டு சினிமாவில் 'பொதுப் பொது'வென்று ஓடிவருவது போன்றவையெல்லாம் கிடையாது. எல்லாருமே Standing Army வைத்திருந்தார்கள்.  
இதைப் பற்றி ரொம்பவும் விரிவாக எழுதலாம். 
அப்புறம் அந்த தானாபதியா பிள்ளை காணாமல் போய்விடுவார்.
பிள்ளைவாள் அந்த ஸ்பெஷல் ஸ்குவாடைப் பார்த்துச் சொன்னார்:
"இந்த நெல்லெல்லாம் நம்முடையது. வானம் பொழிகிறது. பூமி விளைகிறது. எங்கிருந்தோ வந்த வெள்ளை மூஞ்சிக் குரங்குகளுக்கு ஏன் கொடுக்க வேண்டும்?" 
இந்த வசனத்தை தானாபதியா பிள்ளைதான் நெல்லைக் கொள்ளை 
அடிப்பதற்கு முன்னர் சொன்னார் என்பார்கள்.
ஆனால் அவருக்கும் முன்னால் மேலூர்க் கள்ளர்கள் இதே வாசகத்தைச் சொல்லி வரி கட்டாமல் இருந்து போராடியிருக்கின்றனர்.
திட்டமிட்டபடியே கொள்ளயடித்துவிட்டார்கள். 
களஞ்சியத்தின் காவலாளியை அடித்துக் குற்றுயிராகக் களஞ்சியத்தில் தூக்கிப்போட்டு, அவன் உடல்மேல் நெல் மூட்டைகளை அடுக்கி வைத்துவிட்டுப் போய்விட்டார்கள். 

இந்த நான்கு நெற்களஞ்சியங்களுக்கெல்லாம் பொறுப்பாளராக 
பிர்க்கெட் என்னும் துரை இருந்தார். அவர் நெல்லின் விலைப் பருவத்துக்
கேற்ப நெல்லை விற்றுப் பணமாக்கிக் கும்பினியிடம் சேர்ப்பித்து விடுவார். 
விஷயம் அறிந்த பிர்க்கெட் கட்டபொம்முவை நேரில் வந்து பார்த்து 
விசாரித்தார். தானாபதியைத் தம்மிடம் ஒப்படைக்கச் சொன்னார். 
கட்டபொம்மு கும்பினிக்கு ஏற்பட்ட நஷ்டத்தை ஈடுகட்டி அதற்கும் 
மேலாகக் கூடுதல் தொகை கொடுக்க முன்வந்தார். 
அப்போது தானாபதியா பிள்ளை வேகமாக வந்து தெலுங்கில் 
கட்டபொம்முவிடம் "பணிந்துபோகவே கூடாது", என்று சொல்லி, 
சென்னையில் இருக்கும் கும்பினி தலைமையகத்துக்குச் சென்று 
முறையிடலாம் என்று சொல்லி, "வெள்ளைமூஞ்சிக் குரங்குகளுக்குப் பயப்படக்கூடாது" என்றும் சொன்னார். 
'தானாபதி ஏதோ நெகட்டிவாகச் சொல்கிறான்', என்று பிர்க்கெட் 
அறிந்துகொண்டதோடு 'வெள்ளைமூஞ்சிக் குரங்கு' என்று தம்மைத் 
திட்டுவதையும் புரிந்துகொண்டார். 
ஒரு மொழியை அறிந்துகொள்ளும்போது இந்த மாதிரி திட்டு, வசவு, கெட்டவார்த்தை போன்றவற்றைத்தான் முதலில் அறிந்துகொள்வார்கள். 
அதாவது Normal-ஆன ஆசாமிகள். 
இதையெல்லாம் பிர்க்கெட் சென்னைக்கு ரிப்போர்ட் செய்துவிட்டார். 
கட்டபொம்முவாலும் தானாபதியாலும் பயமுறுத்தப்பட்ட 
பாளையக்காரர்கள் பிராது கொடுத்தனர். 
மேஜர் பானர்மேன் தலைமையில் பெரும்படை திரட்டப்பட்டு 
பாஞ்சாலக்குரிச்சிக்கு வந்து சேர்ந்தது. 
போர் ஆரம்பித்துவிட்டது. 
திடீரென்று கோட்டையை விட்டுவிட்டு தப்பிச்சென்று திருச்சியில் இருக்கும் கும்பினித் தலைமைத்துவத்தைச் சந்தித்துப் பேசி Negotiate 
செய்துகொள்ளலாம் என்ற திட்டத்தோடு 09 -09 - 1799 அன்று 
பாஞ்சாலங்குரிச்சி கோட்டையைக் கைவிட்டு விட்டு கட்டபொம்முவும் 
வேறு சிலரும் தப்பிச்சென்றனர். இதுவும் தானாபதியா பிள்ளையின் 
யோசனைதான்.
கால்நடையாக நாகலாபுரத்துக்குச் சென்று அங்கிருந்து கோலார்பட்டி 
ஜமீனுக்குச் சென்றனர்.
கட்டபொம்முவின் கடும் எதிரியாகிய எட்டயாபுரத்து எட்டப்ப 
நாயக்கரிடம் கட்டபொம்முவைத் தேடிப்பிடிக்கும் கடமை ஒப்படைக்கப் பட்டது. 
வெள்ளையர்கள் உட்பட ஆயிரம் வீரர்கள் கொண்ட படை கோலார்பட்டி அரண்மனையைச் சுற்றி வளைத்துக்கொண்டது. 
கட்டபொம்மு மாடியிலிருந்து அதைப் பார்த்துவிட்டு, தாமும் இன்னும் சிலரும் வெகு நெருக்கமாகக் குதிரைகளில் பாய்ந்து கத்தியால் வெட்டிக் கொண்டே வியூகத்தைப் பிளந்துவிட்டு முன்செல்வது என்றும் தானாபதியா பிள்ளை பின்தொடர்ந்து வருவது என்றும் திட்டமிட்டார். 
ஆயிரம் பேர் கொண்ட படையைத் தம்முடைய சிறிய படையால் பிளந்து கொண்டு கட்டபொம்மு தப்பிச்சென்றார்.
அவர்களுடன் தொடர்ந்து வந்திருக்கவேண்டிய தானாபதியா பிள்ளை 
மாட்டிக்கொண்டார். 
கட்டபொம்முவைவிட அபாயமான ஆள் தானாபதிதான் என்று பானர்மேன் அறிவித்துவிட்டு உடனடியாகத் தூக்கில்போட உத்தரவிட்டான்.
பாஞ்சாலங்குரிச்சியைவிட்டு கட்டபொம்மு வெளியேறிய ஐந்தாம் நாள் நாகலாபுரத்தில் ஒப்புக்கு ஒரு விசாரணையை நடத்திவிட்டு அருகிலிருந்த வேப்பமரத்தில் தானாபதியா பிள்ளையைத் தூக்கில் போடச்செய்தான்.
அவர் இறந்தவுடன் அவர் தலையை உடலிலிருந்து வெட்டி எடுத்தார்கள். அதைப் பாஞ்சாலங்குரிச்சிக்கு எடுத்து வந்தார்கள்.
பழங்காலத்தில் தமிழர்களிடையே இருந்த கொடிய தண்டனைகளில் 
கழுவில் ஏற்றலும் இருந்தது. 
ஒரு கழுமரத்தை எடுத்து அதில் தானாபதியா பிள்ளையின் தலையைச் செருகி அந்தக் கழுமரத்தை பாஞ்சாலங்குரிச்சி அரண்மனையின் முன் நட்டுவைத்தார்கள். 
மக்கள் அனைவரையும் வந்து பார்க்கச் செய்தார்கள். 
தானாபதியின் தலையற்ற உடலை நாகலாபுரத்தில் நாய்களுக்கும் 
நரிகளுக்கும் இரையாகுமாறு போட்டுவைத்தார்கள். 
மேஜர் பானர்மேனின் சீற்றம் அந்த அளவுக்கு இருந்தது. 

$$$$$$$$$$$$$$$$$$$$$$$$$$$$$$$$$$$$$$$$

THE SECRETS OF THE MADURAI MAHAL-#1

திருமலை நாயக்கர் மஹால் ரகசியம் #1

 பகலிலும் சில இடங்களில் பக்கம் பார்த்துத்தான் பேசவேண்டும்.

 திருமலை நாயக்கர் மகாலின் அமைப்பில் சில விசேடங்கள்
 இருக்கின்றன.

 இந்த மகாலில் சிற்சில இடங்களில் நின்றுகொண்டு மிகவும் மெல்லிய குரலில் பேசினாலும் பல அடிகளுக்கு அப்பாலுள்ள குறிப்பிட்ட சில இடங்களில் இருப்பவர்களுக்குக் கேட்கிறது. ஆனால் சில அடிதூரத்தில் இருப்போருக்குக் கேட்கமாட்டாது. அப்படிப்பட்ட அமைப்பை வேண்டுமென்றேதான் ஏற்படுத்தியிருக்கிறார்கள்.

 ஆனால் இந்த அமைப்பு ஒரு நாயக்க மன்னனின் உயிரைக் காப்பாற்றி
யிருக்கிறது.  சொக்கநாத நாயக்கர் என்பவர் திருமலைநாயக்கரின் 
பேரர். அவர் பதினாறு வயதினிலேயே பட்டத்துக்கு வந்துவிட்டார். 
அப்போது ராயசம், பிரதானி, தளவாய் என்னும் மூன்று உயர்தன 
அதிகாரிகளிடம்தான் மதுரைநாட்டின் உண்மையான அதிகாரம் 
இருந்தது.
 அவர்கள்தாம் சொக்கநாதநாயக்கரையும் மதுரைநாட்டையும் ஆட்டிப் படைத்தார்கள்.
 அதுவும் போதாததற்கு, சொக்கநாதரையே கொன்றுவிட சதி செய்தார்கள்.
 அவர்கள் ரகசியமாகப் பேசிய இடம் அந்த எக்கச்சக்கமான இடங்களில் ஒன்று.
 அவர்கள் பேசியதெல்லாம் சொக்கநாதரின் அந்தரங்க மெய்க்காப்பளரின்
 காதுகளில் விழுந்துவிட்டது.
 சொக்கநாதர் உடனடியாகக் counter-coup ஒன்றைச்செய்து அந்த
 மூன்று பேரையும் ஒழித்துக்கட்டிவிட்டார்.

 அதன்பின்னர் சொக்கநாத நாயக்கர் தம் உதவியாளர்களுடன் 
சுயேச்சையாக ஆள ஆரம்பித்தார்.
ஆனால் ருசி கண்ட பூனையல்லவா. ஒரு பயங்கர யதேச்சாதிகாரியாக
 மாறிவிட்டார்.

 ஆயிரம் ஆண்டுகளுக்கு முன்னர் மத்தியகிழக்கு, துருக்கி, பால்க்கன்
 நாடுகளை உள்ளடக்கிய பைசாண்ட்டியம் என்னும் பேரரசு இருந்தது.
 அதன் தலைநகராகிய கான்ஸ்ட்டாண்ட்டிநோப்பலில் ஒரு பெரிய தேவாலயம்  ஒன்றைக்கட்டினார்கள்.
 Hagia Sophia என்னும் அந்தக் கட்டடத்தில் இந்த மாதிரி
 acoustic wonders நிறைய உண்டு. அந்தக் கட்டடமும் திருமலை நாயக்கர்  மகாலுக்கு முன்மாதிரி என்று சொல்வார்கள்.

$$$$$$$$$$$$$$$$$$$$$$$$$$$$$$$$$$$$$$$$$$$$$$$$

LIES INTO TRUTHS

மெய்போலும்மே மெய்போலும்மே!

"பொய்யை மீண்டும் மீண்டும் அழுத்தமாக அடிக்கடி சொல்லிக்கொண்டே வந்தால் அது உண்மையாகத் தோன்றிவிடும். மக்களும் நம்பிவிடுவார்கள்."
இதைச் சொன்னவர் ஜோச·ப் கோயபல்ஸ் என்பவர். இவர் நாட்ஸி 
ஜெர்மனி என்று சொல்லப்படும் மூன்றாவது ரை·க் பேரரசின் பிரசார 
மந்திரியாக இருந்தவர். அதன் சர்வாதிகாரியாகிய அடா·ப்ல் ஹிட்லரின் 
அத்தியந்த நண்பர்.
                                                                                                                                                           உண்மையிலேயே அவருடைய பெயரை 'யோஸெ·ப் கபல்ஸ்' என்றுதான் ஜெர்மானிய முறையில் உச்சரிக்கவேண்டும்.

ஆனால் அவர்தான் முதன்முதலில் சொன்னார் என்று எடுத்துக் கொள்ளக்கூடாது. 
பல காலமாக மதவாதிகளும் உயர்ஜாதியினரும் கையாண்ட காலங்
காலமாக வந்த உத்திதான் அது.
மக்யாவெல்லி என்ற பெயர் சிலருக்குப் பரிச்சயமாக இருக்கும். 
ஆரவல்லி, சூரவல்லியின் கடைசித் தங்கை என்று கப்சா அடிக்கலாம். 
அதையும் நம்பிவிடுவார்கள்.  இப்போது நிலவும் ·பேஸ்புக், விக்கிப்பீடியாவில் தலைவிரித்தாடும் தமிழிய ஜிங்கோயிஸம் ச்சாவினிஸம் போன்றவற்றில் இந்தப் போக்கைத்தானே நாம் அதிகம் பார்க்கமுடிகிறது.
நிக்கோலோ மக்யாவெல்லி என்பவர் ஒரு பயங்கர ராஜதந்திரி. 

அவர் பதினைந்து - பதினாறாம் நூற்றாண்டுகளில் இத்தாலியில் 
இருந்தவர். அவர் ராஜதந்திரி மட்டுமில்லை. ஒரு பல்துறைப் பேரறிஞர். 
வரலாற்றாசிரியர், தத்துவஞானி, எழுத்தாளர். கவிஞர், பாடலாசிரியர், 
இத்தாலிய கடித இலக்கியத்தின் மூலகர்த்தாக்களில் ஒருவர், அரசியல்வாதி. அரசியல்ஞானி. தற்கால அரசியவாதத் துறையின் சிருஷ்டியாளர். 
அவர் காலத்தில் இத்தாலி பல நாடுகளாக இருந்தது. போர்ஜியா, 
மெடிச்சி போன்ற சில பெரிய குடும்பத்தினரின் கைகளில் ·ப்லாரன்ஸ், 
ஜெனோவா, வெனிஸ் போன்ற சிறுநாடுகள் இருந்தன. சிறுநாடுகள். ஆனால் அங்குதான் ஐரோப்பிய ரெனைஸான்ஸ் எனப்படும் மறுபிறப்பு தோன்றியது. கலை, இலக்கியம், சிந்தனை மறுமலர்ச்சி, விஞ்ஞான ஆராய்ச்சிகள் போன்றவை வளர்ந்தன. லியோனார்டோ டாவின்ச்சி, மைக்கலேஞ்ஜெலோ, ர·பேயல் போன்றவர்கள் வாழ்ந்த இடம், வாழ்ந்த காலம். உலகின் பொருளாதாரத்தை ஓரளவுக்கு இந்த நாடுகள் தம் கட்டுப்பாட்டில் வைத்திருந்தன. போர்ஜியா குடும்பம் போப் ஆண்டவர் பதவியிலும் இருந்தது. மெடிச்சிகள் அவர்கள் பங்குக்கு கார்டினல் போன்ற பதவிகளில் இருந்தனர். 
மிகப் பெரிய பணக்காரர்கள். செட்டிநாட்டு பாஷையில் சொல்வதானால் லகிட்டுப் பணக்காரர்கள்.
போர்ஜியா குடும்பத்தைச்சேர்ந்த போப் ஆறாம் அலெக்ஸாண்டர் 
ஒழுக்கம் கெட்ட மகா அயோக்கியன். அவனுடைய மகனாகிய கெஸேர் 
போர்ஜியா அரக்ககுணமும் அதிகாரவெறியும் ஒழுங்கீனமும் கொண்டவன்.  
அவனை மாடலாக வைத்து மாக்யாவெல்லி THE PRINCE என்றொரு 
அர்த்த சாஸ்திர நூல் ஒன்றை எழுதினார். 
வெற்றியையும் குறிக்கோளையும் வைத்து செய்யப்படும் எந்தச் 
செய்கையிலும் ஒழுக்கம், தர்ம, நியாயம் போன்றவற்றைப் பார்க்கக் கூடாது என்று சொல்வார். அடையும் வெற்றியும் குறிக்கோளுமே செய்த காரியங்களை நியாயப் படுத்திவிடும் என்பது அடிப்படைக் கோட்பாடு. 
·பேஸ்புக்கிலும் விக்கிப்பீடியாவிலும் ஏராளமான பொய்களை எடுத்துக்கட்டி நிறையப் பரவவிட்டிருக்கிறார்கள். 
அவற்றை ஏராளமானோர் அப்படி அப்படியே நம்பிவிடுகிறார்கள்.

&&&&&&&&&&&&&&&&&&&&&&&&&&&&&&&&&

HASH AND OCTOHORP

#####

நான் எழுதும் தொடர் கட்டுரைகளின் பாகங்களின் நம்பரை 
எழுதும்போது Hash என்று குறிப்பிடப்படும் இந்தக் குறியை - # பயன்படுத்துகிறேன். 
இது டெலி·போனில் டயல் ஸிஸ்டம் மறைந்து பட்டன் 
ஸிஸ்டம் வந்தபோது டெலி·போன் பட்டன்களில் இடம் பெற்று 
பரவியது. 
அதற்கு முன்னர் அதனை 'நம்பர்' என்னும் சொல்லுக்கு உரிய 
குறியாகப் பயன்படுத்தினோம். நம்பர் 6 என்பதை #6 என்று எழுதும் 
வழக்கம் ஏற்பட்டது. 
இந்தக் குறி மிகவும் புராதனமானது. 
பண்டைக்காலத்தில் கெல்த்தியர்(Celts) என்னும் இனத்தவர் 
இருந்தனர். அவர்களிலேயே ட்ரூய்ட்(Druid) என்னும் பிரிவினர் 
இருந்தனர்.
அவர்களுடைய மாந்திரீக சாஸ்திரத்தில் இந்தக் குறியீடு இடம்
பெற்றது. 
அவர்களுடைய மாந்திரீகச்சடங்குகளில் யாககுண்டங்கள் 
மாதிரியும், மண்டலங்கள் மாதிரியும் உள்ள அமைப்புக்கள் பயன்
பட்டன. 
அந்த வகையில் இருந்தக் குறியீட்டின் அமைப்பில் சில 
மண்டலங்கள் போடப்பட்டன. 
அவர்களுடைய வாஸ்து சாஸ்திரத்திலும் இந்த அமைப்பு 
வரும். நடுவில் ஒரு சதுக்கம் இருக்கும். அதனை Village அல்லது 
Town Square என்பார்கள். அதனைச் சுற்றிலும் எட்டு பாகங்களாக 
Plots அல்லது Fields அமையும். தோட்டந்துரவு, விவசாய நிலங்கள், 
குடியிருப்புகள் அந்த ப்லாட்களில் அமைந்திருக்கும். இவற்றின் 
இடையில் வீதி, தெரு, வரப்புகள் போன்றவை செல்லும். 
இதற்கு ஒரு பெயரும் இருந்தது. 

'Octohorp'.

Octo என்பது Eight; Horp என்பது Field.

$$$$$$$$$$$$$$$$$$$$$$$$$$$$$$$$$$$$$$$$$$$$$$

Written 12/03/2013

அன்பர்களே,

நேற்று ஒரு குறிப்பு எழுதியிருந்தேன்.

>>>>>>>>>>>>>>>>>>>>>.
என்னத்தைக் கண்டோம்?

வேதம், வேதாந்தம், ஆகமம், தந்திரம், இதிகாசம், புராணம், சாஸ்திரம்,
வித்யா, சடங்கு, சம்பிரதாயம், ஆசாரம், பூஜை, புனஸ்காரம், உபாசனை,
தியானம், அர்ச்சனை, ஜபம், தோத்திரம், துதி, நாமாவளி, உச்சாரணம்,
உச்சாடணம், ஹோ¡மம், யாகம், திருமுறை, தேவாரம், நாலாயிரம், -
இன்னும் இவை போன்ற பல சொற்கள் அதிகமாகப் புழக்கத்தில் உள்ளவை.

ஆனால் இவை எவ்வெவற்றைக் குறிக்கின்றன என்ற மிக அடிப்படையான
விபரங்கள்கூட மலேசியத் தமிழ் இந்துக்களில் பெரும்பான்மையினருக்குத்
தெரியாது.

இவை இந்து சமயத்தின் முக்கியமான சொற்கள். அடிக்கடி யாராவது
பேச்சுவாக்கில் சொல்வார்கள்.

நான் சொல்வது உண்மையா இல்லையா என்று பரீட்சை செய்து
பார்க்கவேண்டியதுகூட இல்லை.
விவாதம் பண்ணவேண்டியதும் இல்லை

உங்களுக்கே தெரியும்.
>>>>>>>>>>>>>>>>>>>>

இது நான் எழுதியது.
அதன்பேரில் ஒரே ஓர் ஆள், 'உபாசனை, பூஜை, ஜபம்' பற்றி
கேட்டிருந்தார்.
இதையெல்லாம் பொது அரங்கத்தில் கேட்மாட்டார்கள். அதான் இருக்கே...... ச்சேட் மெஸேஜ். அதன்மூலம். என்ன கேட்கிறார்கள் என்பது
ஏன் மற்றவர்களுக்குத் தெரியக்கூடாது என்று நினைக்கிறார்கள் என்பது
அவர்களுக்குத்தான் தெரியும். அறியாமையை அம்பலப்படுத்துவானேன் என்ற
எண்ணமாக இருக்கலாம்.
கீழ்க்கண்ட விபரங்கள் நான் 2007-இல் எழுதிய மடலில் ஒரு பகுதி.
அதில் கொஞ்சம் சேர்மானம் சேர்த்து நகாஸ் வேலை செய்து அவருக்கு
மெஸேஜில் அனுப்பினேன்.

>>>>>>>>>>>>>>>>>>>>>>>
மந்திரஜபம் முதலியவற்றைக் கைக்கொண்டு செய்யப்படும்
உபாசனைகளுக்குக் கிரமம் உண்டு.
இக்காலத்தில் அத்தனை ஆசார அனுஷ்டானங்களுடன் செய்வது
சிரமம்தான்.
மானச ஜபத்தைக் கைக்கொண்டால் வெளிப்படையான ஆசார
அனுஷ்டானங்கள் குறைந்துவிடும்.
எந்த அளவுக்குச் சடங்குகள் சம்பிரதாயங்களில் மனதைச்
செலுத்துகிறீர்களோ, அந்த அளவுக்கு உங்களுடைய உபாசனையின் மையப்பகுதி - முக்கியமாக கருப்பொருள் - அதன்மீது செலுத்தவெண்டிய கவனமும் ஈடுபாடும் குறைந்துவிடும்.
தற்காலத்து இளைஞர்கள் உபாசனை செய்யவேண்டும் என்று
எண்ணுவதில் தவறில்லை. வேலைகளுக்கும் நடுவில் செய்யவேண்டும் என்றால் அதற்கேற்றவகையில் அதை வைத்துக்கொள்ளலாம்.

 KISS
 Keep It Short and Sweet.

மிக நீளமான மந்திரமோ, உக்கிரமூர்த்திகளின் மந்திரங்களோதான்
மிகவும் ஆற்றல் உள்ளவை என்றும் நினைக்கக்கூடாது.
அதெல்லாம் ஒரு மாடர்ன் ட்ரெண்ட்.
'நாயோட்டும் மந்திரம்' என்று சித்தர்கள் மரபில் ஒரு ரகசிய
மந்திரத்தைக் குறிப்பிடுவார்கள்.

 "நாயோட்டும் மந்திரம் நாதன் இருப்பிடம்
 நாயோட்டும் மந்திரம் நாம் அறியோமே!"

அந்த 'நாயோட்டும் மந்திரம்' ஒரே ஓர் எழுத்துத்தான்.
  தெய்வங்களுக்கு உரிய மூலமந்திரங்கள் ஓர் அட்சரத்திலிருந்து எட்டு அட்சரம் வரைக்கும் இருக்கும்.
நாயோட்டும் மந்திரம் சிவ பரம்பொருளுக்கு உரியது.
விநாயகருக்கு ஓர் அட்சரம். அம்பிகைக்கு ஓர் அட்சரம்,
சுப்பிரமணியருக்கு ஓர் அட்சரம், கிருஷ்ணருக்கு ஓர் அட்சரம்
என்றெல்லாம் இருக்கின்றன.
இவை ஜபத்துக்கும் தியானத்துக்கும் பயன்படக்கூடும்.
இந்த அட்சரங்களுக்கு மேல் பதினைந்து அட்சரம், அஷ்டாட்சரம்
என்றெல்லாம் நிறைய இருக்கின்றன.
'மாறல்' என்னும் முறையின் மூலம் சிவனுக்கு இருபத்தைந்து அட்சரங்கள்
வருமாறு செய்வார்கள்.
'சஹஸ்ராக்ஷரீ வித்யா' என்பது ஆயிரம் அட்சரங்களைக் கொண்டது.
பல அட்சரங்களைக் கொண்ட வலுமிக்க சுப்பிரமண்ய மந்திரம் கூட புழக்கத்தில் இருக்கிறது.
இவையெல்லாம் உபதேசக் கிரமப்படி வாங்கிக்கொள்ளவேண்டியவை.
'நமசிவாய'  மந்திரத்துக்கு உபதேசமே தேவையில்லை என்று சில
சான்றோர் சொல்லியிருக்கிறார்கள்.
தட்சிணாமுர்த்தியே உபதேசித்துவிடுவார்.
குருவைத் தேடுபவர்களுக்கு மஹாதேசிகனான சிவனோ, முருகனோ,
அம்பிகையோ குருவாய் வருவார்கள் என்று சாஸ்திரங்கள் சொல்லும்.
அல்லது குருவை அனுப்புவார்கள்.
இன்னும் எழுதலாம்....

அன்புடன்

ஜெயபாரதி